Como cada xoves, a veciñanza de Corrubedo volveu concentrarse hoxe a carón do centro de saúde local (no edificio da Casa do Mar) para reivindicar a continuidade do servizo médico. “Levamos dende principio de novembro sen médico”, comentaron as persoas mobilizadas, poñendo o foco na irregularidade do servizo: “O médico vén algún día entre semana, dúas horas, e algunhas semanas nin aparece”. Tamén mostraron a súa intención de seguir manifestándose todos os xoves e engadiron a súa intención de viaxar a Santiago para incrementar as protestas e facer que se escoiten na capital galega.
Tanto na concentración deste 24 de novembro coma no do xoves pasado púxose o foco na necesidade de seguir insistindo e alzando a voz para a recuperación do servizo, tal e como se fixo en Palmeira, “onde tiveron que padecer a falta de médico durante meses até que a loita veciñal conseguiu forzar ao Goberno galego a cubrir a praza cunha doutora a tempo completo”.
As accións están a ser apoiadas polo PSOE local e o BNG, entre outras agrupacións. Nas concentracións do xoves pasado, os membros do BNG expresaron o seu temor de que a falta de médico continuada sexa “a antesala perfecta para o feche do consultorio de Corrubedo como aconteceu cos de Taragoña e Cabo de Cruz, clausurados a comezos da pandemia e que nunca máis volveron abrir”
