Un total de 56 persoas participaron este domingo 13 de novembro na terceira e derradeira etapa da peregrinación a Compostela, seguindo o trazado do Camiño a Santiago pola ría de Muros-Noia, organizada polo Club de Xubilados de Lousame para conmemorar o Ano Xacobeo.
Despois de tres aprazamentos motivados polas malas condicións meteorolóxicas, finalmente o tempo acompañou e a expedición partiu de Bertamiráns sen incidencias.
Coma nas etapas anteriores, a expedición foi guiada polo técnico municipal de Deportes, Germán Romero.
Romero contou coa colaboración do presidente do Club de Xubilados de Lousame, Francisco Avelino García Nieto; o concelleiro de Turismo e Relacións Veciñais, José Antonio Ces Barreiro; do técnico municipal de Voluntariado, Xosé Manuel Outeiral, canda as dúas voluntarias europeas Ezgi Alkaya e Ülkü Kosdas; e da licenciada en historia e técnica municipal de Lousame, Mayte Sobradelo.
A maiores, nesta quenda sumáronse o concelleiro de Obras, Ramón Martínez, e a concelleira de Sanidade e Protección Civil, Yésica Fernández Míguez.
O grupo O Son do Pote foi o encargado de amenizar musicalmente tanto a entrada en Santiago como a estancia no Obradoiro, onde as persoas participantes despregaron unha pancarta coa lenda: Xubilados de Lousame.
