O alumnado de 3º da ESO do IES Praia Barraña participou este martes 18 de outubro nunha das visitas teatralizadas ao Pazo de Goiáns que realizan Os Quinquilláns para coñecer a historia da construción e da contorna natural que a rodea. O Concello, organizador desta iniciativa, explicou que as visitas teatralizadas para o público xeral serán este sábado e domingo.
Estas experiencias, engaden dende a Área de Cultural do Consistorio, “teñen como finalidade dar a coñecer o noso patrimonio e a historia do Pazo de Goiáns a través do punto de vista dos personaxes baseados nas persoas que o habitaron”. Por certo que para a elaboración destas visitas teatralizadas realizouse un encontro coa veciñanza dirixido a poñer en común a sabedoría popular e os recordos das e dos boirenses que estiveron vinculados ao Pazo.
As visitas teatralizadas para o público xeral van ser este sábado 22 de outubro ás 17.30 horas e o domingo día 23 ás 11.15 horas. As inscricións están aínda abertas na Casa da Cultura de Boiro. En caso de choiva, a actividade trasladarase aos días 5 e 6 de outubro de 2022.
