Malencolía proxéctase este sábado en Boiro

Malencolía (2021), o filme do galego Alfonso Zarauza, autor de Ons e de A noite que deixou de chover, será proxectado este sábado ás 20.30 no Centro Social de Boiro. Trátase dunha actividade cultural abeirada ao Ciclo de Cine Mestre Mateo que desenvolve de xeito itinerante a Deputación da Coruña (levando aos nosos concellos os audiovisuais recoñecidos no certame galego).

Malencolía é un filme de intriga que conta a historia de Sira e Pepe, quen, tras 10 anos vivindo en Berlín, deciden dar un novo rumbo á súa vida regresando a Galicia. Con ese obxectivo, comprarán unha casa nunha aldea que consideran abandonada, pero na que vive unha señora coa que manterán unha estraña relación.

Trátase dun filme galego de 2021 dirixido e escrito por Alfonso Zarauza e rodado en lingua galega. Está protagonizado por Melania Cruz e Xulio Abonjo e é unha mestura de cinema de terror e comedia. Recibiu 11 nomeamentos na 20ª edición dos Premios Mestre Mateo, sendo o gañador de dous premios, mellor actor secundario para Diego Anido e mellor actriz secundaria para Iolanda Muíños.