Este luns póñense á venda as entradas para a Xuntanza do Maior de Ribeira (o 6 de novembro na Fieiteira)

O Concello de Ribeira informou de que este luns 17 de outubro está previsto que se poñan á venta as entradas para asistir á Xuntanza do Maior, un evento que regresa ao municipio logo de dous anos de pandemia. Será o domingo 6 de novembro.

A concelleira de Servizos Sociais, Ana Barreiro, foi a encargada de presentar esta actividade, estando acompañada da xefa de servizo deste departamento, Francisca Vidal. Unha vez máis, o Pavillón da Fieiteira será o escenario onde se desenvolverá o evento, previa eucaristía na misa no templo parroquial de Santa Uxía nunha hora aínda por concretar.

Barreiro explicou que haberá autobuses lanzadeira dende o casco urbano para facilitar o transporte ata o complexo polideportivo, estando prevista a apertura de portas para a unha da tarde.

Ademais do tradicional xantar, a xuntanza incluirá baile amenizado por un grupo musical e sorteo de agasallos. Por outra banda, explicou a edil, habilitarase un dispositivo de seguridade con ambulancia e persoal de emerxencias para atender calquera incidencia.

As entradas poranse a venta na Oficina de Atención Cidadá da Casa do Concello, onde unha persoa traballadora do Concello encargarase deste labor, xunto coa organización e distribución de mesas.

O prezo será de 16 euros, importe que se poderá pagar non só con tarxeta bancaria (o modo recomendado) senón tamén en efectivo.

Hai de prazo para adquirir a entrada ata o 2 de novembro, tendo preferencia os xubilados maiores de 55 anos empadroados en Ribeira. En función do ritmo de venta, abordarase a posibilidade de abrir a xuntanza aos maiores doutros municipios.

As previsións que manexa o Concello roldan o milleiro de asistentes en sintonía co rexistrado en edicións anteriores.