O Concello de Dodro convoca unha nova edición do “Mini Premio Eusebio Lorenzo Baleirón:
concurso literario “das viaxes e dos soños”, dirixida, ao alumnado da ESO.
O certame toma o seu nome da obra que o poeta de Dodro Eusebio Lorenzo Baleirón publicou no ano 1985, con só 23 anos, na que se narraba as aventuras de Brais e Anselmo, en cuxa última páxina dicía así: “Esta é a historia dun suceso non sei se pasado ou presente, non sei se soñado ou vivido. Esta é a historia dun desexo expreso en palabras. Unha viaxe no interior dun neno e dun home que á súa maneira son tódolos nenos e homes que coñezo, un camiño trazado pola néboa e a lembranza… Estas son voces que falan por si mesmas, ninguén máis guiará o seu destino.
Eles, coma nós, saben que soñar sempre será necesario…” Polo tanto este concurso ten como
obxectivos: promover a creación literaria, o uso da lingua galega e a creación artística entre a
mocidade “que soña” como diría o propio autor.
A participación no certame é individual e pode realizarse na modalidade de fotocreación ou de videocreación literaria, pois o Concello de Dodro entende que a linguaxe literaria debe adaptarse aos novos soportes de comunicación cos que actualmente convive a mocidade. As obras presentadas deben estar en lingua galega e versar sobre as viaxe e os soños.
O prazo de presentación dos traballos remata o día 2 de decembro. As bases do certame poden consultarse na web municipal: www.dodro.gal.
Establécese un único premio dunha estadía e entradas gratis para dúas persoas ao CAUDAL FEST2023, un festival de música que se celebrará en Lugo os días 15 e 16 de setembro de 2023. A entrega deste galardón terá lugar o 10 de decembro, coincidindo coa do XXXV Premio de Poesía Eusebio Lorenzo Baleirón.
O Concello de Dodro convidou a participar neste concurso aos centros de ensino secundario das comarcas do Sar, do Barbanza e do Baixo Ulla e agarda que a mocidade se anime a soñar a través da creación literaria como xa o fixo o poeta, Eusebio Lorenzo Baleirón.
