A rapazada do CEIP de Portosín liberou de lixo as praias Coira e Gafa

O CEIP de Portosín sumouse novamente ás actividades de activismo ecolóxico participativo da Asociación Ecoloxista ADEGA. Ao abeiro destas accións, o pasado 14 de outubro a comunidade escolar do dito centro educativo colaborou na xornada anual de limpeza simultánea de praias convocada pola asociación, contando para este traballo coa colaboración do Concello de Porto do Son. Os traballos focalizáronse nas praias de Coira e da Gafa, as dúas no núcleo de Portosín.

As nenas e nenos, coa axuda do profesorado, recolleron todo tipo de material (cabichas, pequenos plásticos, partículas de porexpán, algún anaco de embarcacións, rodas, rolla branca, cordas, botes, latas de conservas e bebidas, toalliñas, cristais, ladrillos, etc) e aproveitaron, coa súa acción, para facer un novo chamamento de urxencia a prol de incrementar o coidado do noso mar.

A Limpeza Simultánea de Praias convocada a semana pasada por ADEGA contou con 600 participantes (particulares, centros de ensino, escolas de surf, etc) de todo Galicia e nun primeiro balance guindou unha cifra de lixo recollida de arredor de 700 quilogramos.