Impulsar dende a nenez modelos de maternidade e paternidade positivas e fomentar a formación neste ámbito é un dos grandes obxectivos do programa Espazos en Centros Educativos, un servizo de atención socioeducativa que impulsa a Concellaría dos Servizos Sociais da Pobra do Caramiñal coa colaboración da Asociación Socioeducativa Antonio Gandoy en seis colexios da localidade: nas unitarias do Vilariño, A Granxa e A Angustia, no E.E.I. Fernández Varela, no CEP Salustiano Rey Eiras e no CEP Pilar Maestú Sierra. Este último centro foi o escollido para a presentación desta iniciativa.
Participaron no acto a concelleira dos Servizos Sociais, Amparo Cerecedo (BNG); Olaia González, en representación da dita asociación; e a educadora familiar do Concello, Lidia Martínez.
Este novo programa formativo de balde comezará na vindeira semana, impartido por unha psicóloga que dea resposta a necesidades e inquedanzas detectadas polo persoal educativo dos centros de ensinanza: habilidades sociais, habilidades de comunicación, educación non sexista, educación en valores, normas e límites, educación emocional, resolución de conflitos e redes sociais.
A acción está dirixida a alumnado da educación infantil e primaria, así como ás súas familias e profesorado. Nas accións traballarase semanalmente durante o curso lectivo en grupo, aínda que tamén se realizarán intervencións individuais coas familias e crianzas que o precisen.
