A delegación en Ribeira da AECC (Asociación Española Contra o Cancro) vai organizar unha andaina solidaria o vindeiro sábado 15 de outubro a partir das 17.30 horas. Realizarase baixo o lema Ribeira en marcha contra o cancro. Nesta edición, o colectivo local da AECC conta coa colaboración da Asociación de Veciños de Carreira para a o deseño da ruta.
A intención é que sexa “unha andaina familiar e accesíbel”, sinalaron as persoas integrantes da asociación, engadindo que será unha camiñada na que poderán participar adultos, nenos, xente en cadeira de rodas ou carros de bebé. Segundo especificou o presidente deste grupo de veciños, Moncho Sampedro, “tratarase dunha ruta urbana, cun percorrido por zonas peonís, con saída e chegada á praza do Concello”. A andaina discorrerá polo paseo da Ameixida, onde os organizadores teñen pensado realizar un acto simbólico.
Na presentación da actividade tamén estivo a presidenta da delegación en Ribeira da AECC, María José Carreira, que explicou que a andaina está enmarcada por outras actividades. Así, este sábado 15 de outubro pola mañá, ás 11.30 horas, os alumnos do Ximnasio Cardalda levarán a cabo unha exhibición na praza do Concello, posteriormente, ás 13.00 horas, a Escola de Baile el Tomasón realizará tamén unha actuación. Os membros da asociación estarán durante esa mañá repartindo dorsais e recollendo inscricións. Contarán ademais coa participación do deportista Abraham Benítez, veciño de Carreira. O custo da andaina é de 5 euros para os adultos e de tres para os menores de 12 anos. A maiores tamén se pode colaborar mercando unha camiseta, de color verde en homenaxe á cor da esperanza, dun prezo de 5 euros. Tras rematar a andaina realizarase un sorteo de 50 premios cedidos polos establecementos colaboradores.
Para anotarse cómpre cubrir un formulario en liña ou inscribirse nun dos seguintes comercios: Xoguetería Voilá, Conxelados Basoñas Mar, Academia Yara, Libraría Master, Deportes Estévez, Atmósfera Champion, Cafetería Samba, Flores e Frutas Betty, Estilismo Lola, Alía deportes, Froitería Mercabarbanza, Ximnasio Cardalda, Escola El Tomason, Café bar da Praia, Perruquería Tina de Castiñeiras, Ultramarinos Lubina, Farmacia Xurxo Ferrón, Café bar Tenerife (Carreira), o quiosco e local de Cáritas (Palmeira), Libraría Aguiño e Estanco de Mercedes Fernández (Aguiño).
