Esta fin de semana toca dar avances na reescritura do noso pasado coas voces daqueles que foron silenciados, moitas desas voces aínda esquecidas e moitas aínda por desvelar e reivindicar. Este é un dos obxectivos do XII Seminario sobre a Memoria Diso no se fala , que se celebra na nosa comarca, nos concellos de Rianxo e Boiro, do 23 ao 25 de setembro.
A convocatoria do Seminario constitúe, globalmente, unha proposta para a reconstrución da memoria democrática no contexto escolar. Preténdese suxerir aos asistentes unha reflexión sobre o fenómeno da represión, sobre a desapiadada depuración sufrida pola poboación e, especificamente, en Rianxo e Boiro. O obxectivo último do Seminario é “posibilitar un mellor coñecemento do noso pasado máis recente e provocar tamén que a actualización dos coñecementos sobre os temas abordados nesta edición contribúa, no alumnado indirectamente beneficiario da reflexión, á comprensión do presente e á adopción dunha actitude responsable e solidaria na defensa da liberdade, da democracia e da xustiza”.
O programa inclúe media ducia de relatorios a cargo de Pilar Sampedro, Lola Ferreiro, Aurora Marco, Xesús Santos, Xoán Hermida, Cristina López Villar e Xosé Deira. Tamén inclúe a presentación do libro Caminos de resistencia do militante antifascista e ex-guerrilleiro Francisco Martínez López, Quico.
