A Mancomunidade Barbanza Arousa presentou un balance da actividade turística na comarca xerada ao longo deste verán 2022. Fíxoo tras contactar con diferentes establecementos turísticos do territorio (hoteis, cámpings, casas de turismo rural, vivendas turísticas e empresas de actividades) coa finalidade de realizar unha escoita activa sobre as percepcións do empresariado acerca desta tempada. As enquisas deron como resultado un balance positivo da tempada estival post-COVID, con resultados “moi favorábeis”.
No balance faise saber que o perfil do turista do destino Barbanza Arousa continúa a ser “principalmente nacional e de proximidade” aínda que nesta tempada os visitantes estranxeiros tamén se achegaron ata o noso territorio desde países como Francia, Alemaña ou Inglaterra.
As sensacións transmitidas polos visitantes ao empresariado turístico foron como dixemos “moi positivas”, sendo as ganas de ocio e de desfrutar o sinal de identidade do visitante deste verán que está a piques de rematar.
Por outra banda, no balance reflíctese o efecto positivo que tiveron (en liñas xerais) nos establecementos consultados as programacións festivas desenvolvidas polos concellos, que conseguiron dinamizar activamente as reservas de última hora en moitos momento do período estival.
