O Plan Único (POS+2022) da Deputación da Coruña alcanzará este ano os 10.897.857 euros investidos nos concellos da comarca de Barbanza, dos que 3,6 millóns xa teñen como destino o financiamento de 42 obras e preto de 1 millón destínase a financiar gastos sociais nos municipios co obxectivo de “protexer aos colectivos máis vulnerábeis”. A cifra de obras irase incrementando ao longo do ano cos fondos adicionais do plan, explicou a Deputación.
O presidente provincial, Valentín González Formoso, remarcou a utilidade deste programa para “contribuír á reactivación económica, cun investimento moi importante que este ano alcanza os 90 millóns na provincia, mellorar infraestruturas e servizos municipais e dar apoio aos concellos nos seus programas sociais”
884.587 euros para gasto social
O Plan Único achega 884.587 euros aos 11 concellos da comarca para gastos sociais. As contías repartidas nos diferentes municipios oscilan entre os 51.875 euros de Carnota e os 133.761 que recibe Ribeira. Reforzo do persoal adscrito aos servizos sociais e axuda no fogar, creación de axudas para a cobertura de necesidades básicas coma vivenda, alimentación, gastos médicos e farmacéuticos ou escolarización dos colectivos máis vulnerábeis son algunhas das cuestións ás que os concellos están a destinar estes fondos.
3,6 millóns para 42 obras
Dentro do plan, todos os concellos da comarca executarán un total de 42 obras de humanización de rúas e espazos públicos, mellora nas redes de iluminación e saneamento, renovación de estradas, actuacións en instalacións municipais ou accións para incrementar a seguridade peonil, entre outras.
Entre os investimentos a Deputación destaca a ampliación das pistas deportivas de Saamil-Corrubedo (116.339 €), a renovación do parque de A Capela (179.566 €) e a construción dun novo parque infantil en Artes (114.838 €) en Ribeira, a mellora de beirarrúas en Pedra da Bouza (182.164 €) e urbanización das rúas Tenencia e Pesqueira (100.546 €) en Boiro, a renovación da cuberta do polideportivo Rosalía de Castro de Rianxo (171.432 €), a humanización da rúa Esperante (167.575) e mellora do pavillón polideportivo da Serra de Outes (62.352 €), a renovación de pavimentos en rúa da Igrexa, Santa Cristina de Barro, Carracido, Pereiro de Arriba, Obre e outros núcleos rurais de Noia (171.020 €) ou humanización da ruela Outonil e a construción de beirarrúas en Eiravedra, O Pozo, Coira e Freixedo en Porto do Son (335.195 €).
Entre os concellos que apostan por mellorar camiños e estradas municipais figuran Muros (412.353 €), Lousame (146.782€), Carnota (173.969 €), Mazaricos (285.512 €).
Amais, seis concellos da comarca (Carnota, Lousame, Mazaricos, Noia, A Pobra do Caramiñal, e Rianxo) destinan parte dos fondos do Plan Único a financiar gasto corrente, que inclúe servizos básicos como o alumeado municipal ou a recollida de lixo. Outros cinco (Boiro, Carnota, Muros, A Pobra e Ribeira) destinan este ano parte dos fondos a redución de débeda.
A entidade provincial lembra que o Plan Único ofrece aos concellos total liberdade á hora de decidir no que investir os fondos que lles achega a Deputación, cunha distribución que se basea en criterios obxectivos como a poboación, superficie, número de parroquias ou esforzo fiscal de cada municipio.
