Realista, participativo, social e transformador. Estas foron as palabras coas que o executivo local cualificou o orzamento municipal da Pobra do Caramiñal para o orzamento municipal do 2022, cuestión que se leva ao pleno extraordinario deste 13 de setembro. A concelleira da Facenda, Charo Varela (Nós Pobra), puxo de manifesto a importancia da cifra de 11.504.143’83 euros, case dous millóns máis ca no 2018, cos que “dar resposta aos servizos públicos que dende o Concello se van mantendo e, incluso, mellorando.” Remarcou que “creo que é o maior orzamento que se deu no Concello da Pobra na nosa historia.”
Algo máis dun 30%, 3.498.736 euros, irá destinado ao capítulo de investimentos. Créanse, ademais, partidas que antes non se contemplaban.
A edil dos Servizos Sociais, Amparo Cerecedo (BNG), incidiu no significativo desta presentación: “o proxecto que este goberno ten para desenrolar na Pobra do Caramiñal.” Indicou que responde á demanda diaria da veciñanza e auméntanse as coberturas e programas de carácter social. Respecto a isto último, a modo de resumo, increméntanse a contía para as axudas de emerxencia social, repartimento de alimentos, o Servizo de Axuda no Fogar, prestación para o material e comedor escolar, solicitude de dez novas prazas no centro de día e programas de atención á mocidade, entre outros. Tamén se está valorando a creación de dúas novas vivendas de emerxencia social.
No eido da participación veciñal, algúns dos exemplos son a posta en funcionamento dunha aplicación para trasladar as necesidades directamente ao responsable político de cada área e actuarase nos
centros socioculturais do Campiño, Camiño Ancho e Ribeiriña.
Primeiramente, o alcalde, Xosé Lois Piñeiro (Nós Pobra), quixo escusar a ausencia da concelleira das Relacións Institucionais, Patricia Lojo (PSdeG- PSOE), que non puido asistir á presentación por motivos persoais. Na súa intervención, aclarou que, se ben o investimento é elevado, non supón a suba de impostos para a cidadanía, agás as taxas que subiron de obrigado cumprimento por contrato.
O orzamento compleméntase co aforro económico acadado no pasado mandato ao que sumar os créditos. A esta contía súmase un millón de euros máis que se tratará tamén noutro punto da orde do día da sesión plenaria desta tarde, e que se efectuará co remanente xeral de tesouraría de libre disposición: 250.000 para suplementar partidas e 750.000 para investimentos a maiores.
Fixo tamén un repaso polo apartado de subvencións nominativas, que se verá tamén reforzado: comisións de festas, ámbito deportivo, festival Entrebateas… No que atinxe ás obras, procederase coa asfaltado da rúa Venecia, ampliacións de saneamento e abastecemento, a substitución do firme do polideportivo de Venecia para complementar o proxecto inicial, pavimento do parque do Castelo, reposición das pontes no río Morto ou reformas en centros educativos son algúns dos exemplos.
Todo isto plasma o “esforzo extraordinario para levar uns orzamentos serios, executables e que van mellorar moito os servizos para a cidadanía e o progreso do municipio”, declarou.
