O consello de pesca de Ribeira fai un chamamento á cidadanía para que se una á concentración do día 8 contra o veto europeo

O Consello Sectorial de Pesca do concello de Ribeira decidiu convocar unha concentración como forma de protesta ante a decisión da UE de vetar a pesca de fondo en 87 áreas comunitarias. Por este motivo, o Consello Sectorial fixo un chamamento á cidadanía para que participe na mobilización. Esta será o vindeiro sábado oito de outubro ás sete da tarde.

O punto de encontro será a praza do Concello de Ribeira, presidida pola pancarta pendurada no Consistorio onde se pode ler un lema reivindicativo (Sen o mar morremos. Non ó veto europeo á pesca de fondo) co que o Concello pretende amosar o seu desacordo coa media da CE, un veto que afectaría directamente a arredor dunha trintena de buques entre arrastreiros do litoral e palangreiros do Gran Sol. “Ademais veríanse verían prexudicadas de xeito colateral as artes menores”, engade o Concello.

sdr

Outra das medidas que puxo en marcha este Consello Sectorial é a recollida de sinaturas en apoio ao Manifesto pola pesca, o marisqueo, a acuicultura e a cadea mar-industria europeas redactado pola Consellería do Mar. Tanto o manifesto como a folla de sinaturas poden atoparse na Oficina de Atención á Cidadanía da casa consistorial.

Ademais serán distribuídas polas confrarías dos concellos costeiros de Galicia, polo tecido asociativo e polas empresas municipais.