O Concello de Porto do Son presentou estes días varios proxectos de relevancia para mellorar e poñer en valor diferentes espazos públicos do termo municipal. Por exemplo a habilitación dunha nova pista polideportiva no Colexio de Nebra ou a humanización e recuperación da contorna da Igrexa de Santa María, na mesma parroquia sonense. O Consistorio tamén salientou o importante proceso de humanización levado a cabo a rúa de Santa Irene, en pleno centro urbano da vila.
Respecto da pista do Colexio de Nebra, trátase dun proxecto que vén cun orzamento de 85.000 euros e que poderá ser empregada por alumnado e veciñanza (fóra do horario lectivo). A súa construción abéirase ao Plan de Nova Arquitectura Pedagóxica deseñado pola Xunta para os centros educativos, cuxo obxectivo é achegar infraestruturas máis sustentábeis, innovadoras, accesíbeis e útiles. A pista terá unha superficie de 22 por 12 metros cadrados e estará pechada por un valado dun metro de alto, levantada (pista e área perimetral) sobre unha soleira de 15 centímetros. O sistema de drenaxe será lineal de formigón polímero, conducíndose as augas á rede de pluviais habilitada. A iluminación, sustentábel e eficiente, permitirá a alumnos e veciños o desfrute da pista en calquera intre do día.. Contará con porterías e canastras de gran resistencia e levantadas sobre postes de aceiro. Tamén disporá do equipamento preciso para a práctica de deportes como o tenis, o voleibol ou o bádminton. Dos 85.000 euros de orzamento, 40.960 serán asumidos pola Xunta e o resto polo Concello.
No que atinxe á recuperación e humanización da rúa Santa Irene (O Son) e a Igrexa de Santa María de Nebra, son actuacións financiadas a través do Plan Único da Deputación da Coruña e suman un montante de máis de 375.000€. Na zona da igrexa de Nebra púxose un especial énfase en “devolver a contorna aos peóns”, informou o Concello, que salienta a renovación integral do enlousado con granito silvestre, a mellora na accesibilidade e o subministro de canalizacións de redes de electricidade e telecomunicacións. Tamén foron habilitadas varandas e pasamáns para facilitar a accesibilidade, feitos con aceiro inoxidábel. Respecto da rúa de Santa Irene, quixéronse solucionar os problemas que achegaba o feito de ser unha vía de sentido único na que transitaban vehículos e peóns e na que existía unha área de estacionamento sen delimitar. As obras achegaron unha nova beirarrúa de formigón e granito no seu primeiro treito, dando como resultado un espazo continuo e seguro para os peóns entre a rúa Avellaneda e o Pavillón. Santa Irene tamén conta xa con novos equipamentos, entre os que se atopan árbores, bancos, farois, papeleiras, aparcabicis e marquesiñas de aceiro e madeira a carón do Pavillón. As obras foron posíbeis grazas ao Plan Único da Deputación, que achegou 174.994 € da contía total.
Esta liña de traballo do Concello terá continuidade os días vindeiros con máis obras de humanización en diferentes contornas da vila sonense e da parroquia de Caamaño.
