O Concello de Lousame convocou dous obradoiros gratuítos de apoio a mulleres emprendedoras. Desenvolveranse do 5 ao 26 de outubro na Aula de Informática da Casa da Cultura e en horario de 9:00 a 13:00 horas. Durante sesenta horas, dez veciñas de Lousame poderán asistir aos talleres de comercio electrónico e mercadotecnia (marketing) dixital, impartidos ao abeiro do programa Xeración 20=22.
Poderán participar mulleres de máis de 18 anos, residentes no devandito termo municipal e que estean pensando en emprender ou iniciar un proxecto empresarial. O prazo de inscrición está aberto nos Servizos Sociais de Lousame, teléfono 981 820 494.
Estes dous obradoiros forman parte do terceiro e derradeiro seminario previsto no programa de promoción da empregabilidade feminina Xeración 20=22, que está a desenvolver o Concello de Lousame e que conta co financiamento da Federación Española de Municipios e Provincias (FEMP) e o Ministerio de Igualdade.
Ata o momento, este programa xa formou a outras vinte mulleres de Lousame en introdución á informática e ás novas tecnoloxías, así como en motivación e técnicas para a busca de emprego.
