O pasado 23 de outubro rematou o prazo de entrega das obras candidatas ao XXXV Premio de Poesía Eusebio Lorenzo Baleirón, organizado polo Concello de Dodro. Certame que rende homenaxe ao poeta Eusebio Lorenzo Baleirón, natural do municipio e que constitúe un dos galardóns máis antigos da creación poética galega. Nesta edición destaca a alta participación, na que concorren ata 51 poemarios.
O Concello de Dodro nomeou como responsable do bo desenvolvemento do Premio á poeta, profesora e tradutora, Elvira Ribeiro Tobío. O xurado encargado de valorar os traballados presentados ao concurso está composto polas escritoras: Inmaculada López Silva, Emma Pedreira e Rebeca Baceiredo. Actuarán como presidente o alcalde de Dodro, Francisco Xabier Castro Tourís e como secretario o concelleiro de Cultura e Patrimonio, Xoán Xosé Vicente Franco. Este tribunal dará a coñecer o fallo do premio o 19 de novembro e o acto oficial de entrega terá lugar o día 10 de decembro.
A persoa gañadora deste XXXV Premio de Poesía Eusebio Lorenzo Baleirón recibirá 2.500 € e a obra galardoada será publicada nunha editorial de recoñecido prestixio.
