Empeza a transformación do peirao de Palmeira en base ao anteproxecto deseñado polo arquitecto David Chipperfield e a Fundación RIA

Transformación do peirao de Palmeira Foto Ramón Ces

A primeira fase deste proxecto global, consistente na urbanización do paseo exterior e da coieira, empezou este xoves cun orzamento de 750.000 euros.

As obras desta fase supoñen a intervención nun espazo de 2.000 metros cadrados e en preto de 400 metros en liña da fachada marítima. Nas actuacións inclúen a mellora do espazo público e da mobilidade mediante a ampliación da zona peonil a carón do mar, sobre a coieira existente, e eliminando a barreira visual que supón o actual muro de peche.

A maiores, crearanse balcóns de pedra e gradas integradas no noiro do paseo, ordenarase a circulación rodada con pasos de peóns elevados e renovaranse os pavimentos e o mobiliario urbano buscando reforzar a súa calidade estética, duración e homoxeneidade dos materiais.

Transformación do peirao de Palmeira Foto Ramón Ces

O proxecto foi presentado o pasado mes de marzo tal como recollemos en “obarbanza.gal”, pola titular de Mar, Rosa Quintana, nunha xuntanza en Ribeira na que participaron o arquitecto David Chipperfield afincado en Corrubedo e o rexedor Manuel Ruiz e na que a conselleira explicou que as actuacións previstas no proxecto de mellora da mobilidade e accesibilidade na contorna do porto desenvolveranse en estreita coordinación co Concello de Ribeira e permitirán “renovar a imaxe da dársena e facela máis operativa para os profesionais do mar e atractiva para os veciños e visitantes”.

Transformación do peirao de Palmeira Foto Ramón Ces