Un dos máis importantes escaparates do sector alimentario vencellado ao mar, o salón Conxemar de Vigo, abre as súas portas o vindeiro 4 de outubro (até o 6 de outubro). Entre as empresas que confirmaron a súa asistencia atópase unha da nosa comarca que se mantén fiel á cita co sector que se celebra cada ano no recinto vigués do IFEVI e que xa vai pola súa 23ª edición. Estamos a falar de CONGALSA. A compañía da Pobra do Caramiñal anunciou que dende o seu stand porá o en valor a súa completa variedade de masas recheas baixo o lema O que levamos dentro.
Esta gama, explican dende a empresa pobrense, engloba desde receitas máis cotiás e propostas máis tradicionais até combinacións con ingredientes innovadores que actualizan a variedade de CONGALSA neste apartado. “Trátase, pois, dunha liña de produtos que se adapta a todos os gustos e aos diferentes momentos de consumo”, destaca Julio Simarro, director comercial e de marketing de CONGALSA, engadindo que “a piques de cumprirse 20 anos desde que nos iniciamos na elaboración de masas e masas recheas, atrevémonos a revisar o secreto do noso éxito con novas receitas e formatos, consentindo cada paso do proceso para que a calidade alcance os máis altos estándares”.
Amplo abano de produtos
Dentro da campaña que CONGALSA pon en marcha en Conxemar, a compañía creou un micrositeno que as persoas e empresas interesadas poderán descubrir a súa ampla e diversa variedade de masas. Unha gama que engloba produtos como as empanadillas de masa crebada ou os rolos de primavera, ideais para servir como tapa ou aperitivo e para confeccionar menús infantís; as mini empanadillas ou mini rolos, perfectos para servir en bufets ou cocktails; os seus novos milfollas recheos e mesmo dúas propostas veggie. A ampla gama de CONGALSA neste ámbito, composta por recheos cociñados amodo, como en casa, ou combinados con masas de acabado dourado e textura triscante, brinda á empresa a posibilidade de dar servizo ás necesidades da súa variada clientela, que abrangue principalmente o sector retail e da distribución ou a hostalería e a restauración colectiva, entre outros.
Sobre CONGALSA
CONGALSA é unha das empresas de alimentación líderes do mercado. Coa súa sede principal na localidade coruñesa da Pobra do Caramiñal, a compañía cerrou 2021 unha facturación de 113 millóns de euros e mobilizou un total de 26 millóns de quilos de produtos das súas diferentes gamas. Con presenza comercial en países de catro continentes, en 2020 a empresa formalizou a adquisición da compañía lusa Sulpasteis para fortalecer a súa expansión internacional.
