Pakolas fará bailar á rapazada de Boiro este martes 23 en Barraña

O músico rockeiro Pakolas estará este martes 23 de agosto en Boiro para ofrecer un novo concerto para a rapazada. Será ás 12.00 horas na praia de Barraña, a carón do Edificio das Colonias. Pakolas presentará Rockeamos todas, un espectáculo en galego e inclusivo para todos os públicos.

Pakolas é o nome co que Paco Cerdeira se presenta ante o público infantil, eido no que o músico conta con longa traxectoria. Na súa longa andaina de traballo nas cancións infantís, Paco sempre pon de manifesto que a música é universal pero as letras deben estar pensadas para o público miúdo.

Pakolas interpreta en directo unha selección dos seus propios temas, revisados e rigorosamente escollidos para a ocasión, recollidos en libro-CD da Editorial Galaxia, nos que as protagonistas son ELAS: nenas, nais, inventoras, heroínas, doutoras, figuras femininas que tratan de poñer en valor a importancia de vivir en igualdade, de historias contadoras de superación de desigualdades, e de loita polo respecto e a liberdade.