A parlamentaria socialista Noa Díaz Varela vén de presentar unha serie de iniciativas no Parlamento de Galicia para reclamar á Xunta que amplíe a zona de estacionamento do Hospital Comarcal do Barbanza, antes de que remate o ano. Nas súas palabras, “o Hospital do Barbanza precisa, canto antes, de espazos para que todas as persoas que accedan ao centro poidan aparcar sen problemas e non teñan que deixar os seus vehículos en zonas que non están acondicionados para esa finalidade”.
Engaden que “este centro hospitalario dá servizo a unha poboación de máis de 60.000 persoas, o que fai necesario dotalo de accesos axeitados e de suficientes prazas de aparcamento para así evitar que o persoal traballador, doentes e acompañantes teñan que deixar os seus vehículos en espazos que dificultan a circulación rodada na contorna”.
Díaz esixe alternativas e sinala a existencia de tres parcelas nos arredores do hospital comarcal que “serían as idóneas para tal fin e que ademais “non parecen atopar resistencia por parte das persoas propietarias para a súa venda ou alugueiro”, unha xestión que deberá realizar o propio Concello.
Declarou que “é preciso ampliar os espazos de aparcamento nas inmediacións que encaixen cos novos modelos de accesibilidade, sostibilidade e fomento dos espazos de uso peonil”.
Esta iniciativa, contou coa unanimidade da Corporación Municipal de Ribeira a proposta do Grupo Socialista, e “permitirá mellorar a dotación de prazas de estacionamento de xeito substancial pero tamén reorganizar o espazo da área sanitaria para que o persoal traballador dispoña dun espazo axeitado para os seus vehículos”, sinalou a parlamentaria do PSOE.
