O BNG de Ribeira solicita meirande presenza policial nas rúas para frear os excesos de ruído e os actos vandálicos durante a movida nocturna

O Bloque Nacionalista Galego (BNG) emitiu un comunicado no que reflicte o malestar de múltiples veciños de Ribeira que demandan solucións para os continuos problemas que sofren, en relación á movida nocturna, e que lles impiden descansar e conciliar o sono, con todo o que isto pode provocar para o seu día a día laboral e familiar. No comunicado lémbrase que a raíz do problema non está no funcionamento dos establecementos nocturnos, senón no comportamento dunha parte das persoas que están na noite e na madrugada na rúa, proferindo berros e protagonizando pelexas nocturnas até practicamente o amencer.

Desde o BNG entenden que “o ocio nocturno e o dereito ao descanso poden convivir perfectamente pero para iso é necesario articular solucións que permitan conciliar ámbalas dúas cuestións”. Deste xeito, propoñen que durante as madrugadas a policía incremente os seus percorridos polas zonas con maior afluencia de persoas. “Coa simple presenza policial estamos seguros de que o ruído exterior se podería reducir de maneira considerable, sobre todo se os axentes lles advirten, ás persoas que estea berrando, da obrigación de falar máis baixo”.

Cruz Rivadulla e Luís Pérez Barral

O portavoz do BNG, Luís Pérez Barral, considera que esta é só algunha das medidas que o Goberno local podería poñer en marcha pero “esixiría incrementar o número de efectivos da Policía Local, cuestión que o BNG xa demandou en diversas ocasións contando coa negativa do Partido Popular”. Pérez Barral recriminou que o Goberno ribeirense “manteña á Policía Local moi por baixo dos efectivos necesarios pois, mentres as directivas da Unión Europea recomendan contar cun número de 1,8 axentes por cada 1.000 habitantes, Ribeira atópase lonxe desa cifra, ao contar cun cadro de policías moi minguado”. E engadiu: “Ribeira ten case 27.000 habitantes polo que deberíamos contar con  49 axentes pero seguiremos moi lonxe desa cifra”.

Os nacionalistas din que “as consecuencias páganas os propios axentes que teñen que asumir unha maior carga de traballo pero tamén a poboación”. Na súa opinión, “incrementar o número de axentes contribuiría, ademais, a loitar contra os actos vandálicos e incrementaría a seguridade cidadá, mellorar a calidade e a rapidez nas actuacións e un longo etcétera”.

“Ribeira é unha cidade de servizos e cuxa poboación flotante diaria é moi superior ao padrón municipal, ao que se lle suma o incremento en datas estivais por mor do turismo, cremos que é unha necesidade un incremento policial inmediato” conclúe Barral. 

Ante estas cuestións o BNG vai solicitar ao Goberno local que, no inmediato, “incremente os percorridos nocturnos para evitar que as persoas que están na rúa provoquen un ruído excesivo que impida o descanso da veciñanza e, a medio prazo, incremente o cadro da Policía Local para cumprir co número suficiente de axentes por número de habitantes”.