A Asociación Amicos inaugurou este 2 de agosto os obradoiros participativos de arte reciclada na rúa peonil Pablo Iglesias próxima a entrada do Mercado Municipal de Boiro, en horario de 10:00 a 14:00 horas. Todos os martes de agosto repetirá localización co obxectivo de “levar as rúas a súa principal mensaxe de inclusión das persoas con discapacidade na sociedade”.
Esta acción de sensibilización, segundo informou a asociación comarcal Amicos, permitirá aos participantes no obradoiro coñecer o labor da entidade a través do desenvolvemento de algunhas das actividades que os integrantes de Amicos realizan no seu día a día. As persoas con discapacidade serán os guías dos obradoiros de arte reciclada e todos os materiais empregados foron recollidos nas diferentes limpezas de residuos mariños nas praias que as persoas integrantes da asociación levan liderando durante todo o ano para proxectos ambientais como RE-MAR e Peneira, impulsados por Amicos.
As accións de sensibilización e concienciación repetiranse todos os mércores de agosto, tamén
de 10:00 a 14:00 horas na Alameda de Pobra do Caramiñal e todos os xoves, no mesmo horario,
na zona do Coliseo Noela de Noia.
A iniciativa desenvólvese por segundo ano consecutivo debido a boa acollida dos obradoiros o ano pasado grazas ao equipo Badaboom da Asociación. A través do proxecto de patios dinámicos inclusivos denominado Badaboom y los patios japis créase un entorno inclusivo a través do xogo. O proxecto desenvólvese normalmente na hora do recreo nos centros escolares, pero debido ás vacacións de verán, as actividades terán lugar na rúa.
Dende Amicos animan a todos os nenos e nenas e as súas familias a compartir estes obradoiros de
arte reciclada para coñecer máis de cerca todas as actividades que se levan a cabo na asociación,
como os diferentes proxectos medioambientais que a entidade leva un tempo desenvolvendo.
