Adxudicados os traballos para pavimentar e renovar a auga para consumo e pluvial na rúa Luís Pimentel de Aguiño

O Concello de Ribeira acaba de adxudicar unha nova actuación destinada á pavimentación e renovación da auga para consumo e pluvial na rúa Luís Pimentel en Aguiño.

De entre as 23 ofertas presentadas a execución da obra recaeu na empresa Excavaciones Nima, S.L., e supón un investimento de 78.347,12 euros.

Conforme ao proxecto técnico elaborado, o que se prevé é substituír os actuais servizos de auga potable e pluviais por outros novos, utilizando por unha parte unha tubaxe de polietileno de alta densidade de 90 milímetros de diámetro e por outra un colector de PVC de 315.

Ademais, toda a calzada será pavimentada cunha mestura bituminosa en quente e o pavimento de beirarrúas e bordos que resulten afectados polas canalizacións serán repostos.

Esta iniciativa está adscrita ao POS+2021. O prazo de duración das obras é de catro meses.