O Concello de Ribeira informa de que foi adxudicada a actuación dirixida á dotación dos servizos de saneamento e abastecemento de auga ao lugar de Sampedro, situado na parroquia de Palmeira.
Dende o Concello explican que na actualizade a zona en cuestión “non dispón de redes de saneamento nin abastecemento”, polo que cómpre instalar para a canalización de augas residuais unha tubaxe de 315 metros de longo e 315 milímetros de diámetro, xunto con 16 pozos de rexistro, pola que se conducirán por gravidade ata o punto máis baixo do trazado, onde se implantará un bombeo que as impulsará a través doutra rede de polietileno de 245 metros de longo e 90 milímetros de diámetro, ata a súa conexión á rede xeral.
En canto ao abastecemento de auga, instalarase unha tubaxe de 435 metros.
A adxudicación da obra recaeu en Excavaciones Nima (había 16 ofertas presentadas) e comporta unha inversión de 109.883,50 euros, IVE incluído. Está enmarcada no POS+2021 e o prazo de execución son seis meses.
