A Deputación da Coruña subvenciona con 931.362,39 euros a 202 entidades sen fins de lucro de toda a provincia para a realización de actividades culturais durante 2022. A contía das axudas vai desde os 1.500 euros ata os 25.000. Propostas educativas para promover o bo trato e previr a violencia sexual na infancia, festivais de música tradicional ou obradoiros de arte, ciencia e convivencia en galego están entre os proxectos seleccionados.
Entre as asociacións beneficiarias da partida orzamentaria do departamento de Cultura atópanse a Asociación Profesional de Artistas de Galicia, a Academia Galega de Teatro, Amigos dos Museos de Galicia, anpas dos centros de ensinos de toda a provincia, a Asociación Cultural Naufraxios Galegos, a Asociación Cultural Unha Gran Burla Negra ou a Asociación ONG de Cooperación para o Desenvolvemento Galega de Reporteiros Solidarios.
O responsábel provincial de Cultura, Xurxo Couto, salientou a importancia de reforzar o tecido cultural asociativo, “tan relevante para seguir transmitindo e dinamizando, sobre todo entre a xente nova”.
A resolución e a listaxe de entidades que recibirán as achegas recóllense no BOP do 12 de agosto e tamén poden consultarse e descargarse en liña.
