A Banda de Música da Pobra, protagonista da última fin de semana de agosto

A Concellaría da Cultura e a Banda de Música Ateneo Musical da Pobra do Caramiñal suman forzas a prol da cultura local e froito deste traballo conxunto é unha nova edición do Ateneo Musical. Será na última fin de semana de agosto e terá como escenario a praza Alcalde Segundo Durán.

A titular desta área, Patricia Lojo (PSdeG-PSOE), e Manuel Sobral, director da mencionada entidade melódica, explican que no día 26, ás 22.00 horas, ofrecerán a actuación De tradición xunto con Suso Vaamonde, quen complementará os instrumentos da banda con outros propios do folclore galego.

A programación proseguirá na xornada do día 27, a partir das 20.00 horas, co prato forte do cartel: o VI Festival de Bandas, que se retoma tras dous anos de parada pola pandemia. Contará coa participación da Banda de Coruxo, da Banda de Tenorio e do Ateneo Musical da Pobra.

O evento chegará ao seu remate o día 28, das 21.00 horas en diante, co Concerto de película, a cargo da propia sociedade musical pobrense, que interpretará un total de catorce pezas sonoras de diversos filmes xunto cun soporte visual, creando así un ambiente especial.

A edil puxo a Banda de Música Ateneo Musical da Pobra do Caramiñal como un destacado exemplo de dinamización cultural e creativa, “pois durante todo o verán tivo unha participación elevada e demostrou todo o esforzo extraordinario realizado durante os dous anos previos”.

Doutro lado, o director da banda pobrense puxo en valor o compromiso das familias e da rapazada por todas as horas de traballo e esforzo.

O acceso a todas estas sesións é libre ata completar a cabida.