Unha persoa de 60 anos perdeu a vida e outra resultou ferida tras chocar a lancha motora na que navegaban contra unha batea na Illa de Arousa. En total, cinco persoas estaban a bordo da embarcación no momento dos feitos.
Ocorreu moi preto das 14:00 horas de hoxe na Illa de Arousa, tal e como relatou un dos tripulantes que chamou ao 112 Galicia para pedir axuda.
De inmediato, o Centro Integrado de Atención ás Emerxencias de Galicia (CIAE 112 Galicia) puxo en marcha un operativo que contou coa intervención do Servizo de Gardacostas de Galicia e dos membros de Salvamento Marítimo. Segundo a información facilitada ao 112 polos equipos de emerxencia, as persoas recibiron axuda doutras embarcacións particulares que se atopaban na zona.
Así, a lancha foi remolcada ata o peirao de Xufre. Alí agardaba un dispositivo formado por axentes da Policía Local, efectivos de Protección Civil de Cambados e profesionais de Urxencias Sanitarias de Galicia-061, que pouco tempo despois confirmaron o falecemento dun dos tripulantes do barco sinistrado.
O ocupante ferido tivo que ser trasladado polo helicóptero Pesca 1 de Gardacostas de Galicia ao Hospital Álvaro Cunqueiro.
