O alcalde ribeirense Manuel Ruiz mantivo no mediodía deste 7 de xullo unha xuntanza en Santiago coa xerente da Área Sanitaria de Santiago-Barbanza do SERGAS, Eloíña Núñez, e coas subdirectoras de Atención Primaria e Enfermaría. O motivo da xuntanza era recadar información sobre o déficit de persoal de atención primaria que están a sufrir algúns centros de saúde do municipio.
Na reunión trasladóuselle de forma rotunda ao alcalde que o SERGAS “non vai pechar o Centro de Saúde de Palmeira”, unha dependencia na que nestes momentos seguen cubertas as prazas de enfermaría e de PSX (persoal de servizos xerais) e na que, sinalaron as representantes da Xunta, “os problemas que está rexistrando derivan dunha baixa de longa da duración do seu médico”.
Normalidade en setembro
A este último respecto, comunicaron ao rexedor que “existe a previsión de que este facultativo se poida reincorporar no último trimestre do presente ano.” Mentres tanto, e ata setembro, sinalaron, “estase tentando resolver o problema case día a día, estando cuberto xa, malia comezo da tempada vacacional, practicamente todo o mes de xullo”. En todo caso, engadiron, “a previsión é que no mes de setembro o servizo de atención poida funcionar con certa normalidade”.
No que respecta ao Centro de Saúde de Ribeira, aseguróuselle a Manuel Ruiz que “o servizo vai mellorar substancialmente coa próxima incorporación de novo persoal sanitario”.
O alcalde tivo ocasión de trasladar ao conselleiro de Sanidade da Xunta, Julio García Comesaña, todos os puntos tratados nesta reunión.
