A novela Cornucopia, obra coa que o escritor ribeirense Raúl M. Santos alzouse co Premio Torrente Ballester de Narrativa 2021, presentarase oficialmente este luns, 4 de xullo, en Compostela. A cita será na Libraría Cronopios, ás 19h, e acompañando ao autor estarán a xornalista e comisaria dos premios literarios da Deputación da Coruña, Susana Pedreira, o director xeral de Galaxia, Francisco Castro, e o deputado de Cultura, Xurxo Couto.
Cornucopia, editada pola Editorial Galaxia, está chegando estes días ás librarías de todo o país e supón ademais a estrea do autor Raúl M. Santos (Ribeira, 1976) no panorama literario galego.
A Deputación lembra que esta obra fora elixida por unanimidade como gañadora do Premio Torrente Ballester en decembro de 2021 por un xurado composto polo xornalista e escritor Premio Nacional de Narrativa (2021) Xesús Fraga, pola escritora María Marco, pola xornalista e escritora Nazareth López, pola xornalista cultural Montse Dopico, e polo escritor e gañador deste premio na edicición 2020, Ricardo Losada.
No seu informe o xurado indicara que a obra “é unha parodia moi ben construída, e cargada de ironía, sobre o papel do escritor e a literatura”. No mesmo informe tamén salientaba que “se apoia sobre nunha estructura fragmentaria na liña da literatura posmoderna, pero sen perder nunca o fío nin o ritmo; cunha narrativa moi fluída e con vocación de establecer unha complicidade coa persoa lectora, pero sin por iso ser compracente”.
O Premio Torrente Ballester de narrativa é un dos máis veteranos dos que convoca a institución provincial – en 2021 acadaba a edición XXXIII- e tamén un dos máis prestixiados que, desde o ano 2016, se convoca en dúas modalidades, en lingua castelá e en lingua galega. Na edición de 2021 a gañadora e o gañador de ambas modalidades, María Cureses e Raúl M. Santos, son unha autora e un autor que comparten a singularidade de estar comezando a abrirse camiño no mundo literario.
