O Concello de Rianxo compartiu este luns 4 de xullo os detalles dunha interesante iniciativa de lecer e turismo náutico para este verán. Trátase dun programa de 20 travesías nun histórico valeiro (a Goleta Evangelina) posto a disposición de veciños e visitantes para permitirlles coñecer a fondo a ría dende unha óptica diferente e co privilexio de navegar nunha embarcación local, con porto na dársena de Rianxo, con máis dun século de vida sucando os mares.
As saídas marítimas partirán do Club Náutico de Rianxo e durarán unha hora e media, incluíndo dúas opcións, unha singradura mariñeira polas mañás e unha saída ao atardecer, para “gozar das paisaxes e o solpor”, informou o Concello, engadindo que os meses de xullo e agosto inclúen a meirande parte das saídas, e que o xoves 15 de setembro pecharase o programa o día do Feirón Mariñeiro.
A embarcación escollida é a Goleta Evangelina, con 110 anos de historia pola costa galega. Ten capacidade para 12 prazas e alcanza os 18,70m de eslora, 5 de manga e 1,65 de puntal. Construída nunha carpintaría de ribeira e restaurada nos Estaleiros Catoira de Rianxo, o seu porto base é en Rianxo, onde se pode contemplar acotío.
Travesía mariñeira
A partir das 09:30 no Club Náutico de Rianxo para saír ás 10:00 e visitar tradicións e oficios mariñeiros da ría, como é a cría do mexillón nas bateas.
Travesía atardecer
A partir das 20:30 no Club Náutico de Rianxo para saír ás 21:00 e gozar das paisaxes privilexiadas da ría máis grande e as panorámicas do solpor.
Datas e horario de saída
Xullo
7 (10:00 Travesía mariñeira / 21:00 Travesía atardecer)
9 (10:00 Travesía mariñeira / 21:00 Travesía atardecer)
14 (10:00 Travesía mariñeira / 21:00 Travesía atardecer)
27 (10:00 Travesía mariñeira / 21:00 Travesía atardecer)
29 (10:00 Travesía mariñeira)
Agosto
3 (10:00 Travesía mariñeira / 21:00 Travesía atardecer)
5 (10:00 Travesía mariñeira / 21:00 Travesía atardecer)
10 (10:00 Travesía mariñeira / 21:00 Travesía atardecer)
17 (10:00 Travesía mariñeira / 21:00 Travesía atardecer)
24 (10:00 Travesía mariñeira / 21:00 Travesía atardecer)
Setembro
15 (10:00 Travesía mariñeira)
Inscricións
É necesario inscribirse de xeito presencial e recoller os billetes nos puntos de información turística de Rianxo, cos nomes de cada persoa e un teléfono de contacto. Os billetes reserva presentaranse para o acceso á embarcación.
Prezo
Adultos (a partir de 12 anos): 15€
Nenas/-os (de 0 a 11 anos incluídos): 10€
O pagamento realizarase na embarcación.
Punto de encontro
Club Náutico de Rianxo, na caseta de vixilancia situada na marxe dereita de acceso.
Cómpre chegar media hora antes da saída da embarcación: ás 09:30 para as travesías mariñeiras e ás 20:30 para as travesías ao atardecer.
Teléfonos de información
Turismo de Rianxo: 604 023 753
Tripulación da embarcación: 644 525 976
