Valentín González Formoso, presidente da Deputación da Coruña, e a alcaldesa de Muros, Inés Monteagudo, asinaron este 13 de xullo un convenio de colaboración para o acondicionamento do lavadoiro do Chalón, no dito termo municipal.
A Deputación da Coruña financiará con 12.000 euros o proxecto para o acondicionamento da contorna do lavadoiro, que, segundo indicaron Formoso e Monteagudo, conta cunha cuberta de formigón que se atopa en moi mal estado. A dita contía representa o 80% do orzamento total previsto para a execución da obra, que ascende a 15.000 euros.
A actuación centrarase na substitución da cuberta de formigón que se construíu sobre o lavadoiro e que, nunha inspección encargada polo Concello, foi cualificada “como de moi baixa calidade estética” e “que ademais conta cun mal estado de conservación”.
Os traballos a levar a cabo inclúen a protección do lavadoiro para evitar que sufra calquera deterioro durante o proceso de demolición mecánica do forxado, alicerces e vigas que forman a cuberta. Posteriormente executaranse peitorís perimetrais de 45 centímetros de altura e 30 centímetros de ancho e unha escaleira de pedra.
O prazo previsto para a execución dos traballos desde o inicio das obras é de tres meses.
