A concellaría de Benestar Social, Igualdade e Diversidade organiza o I Concurso de Carteis Orghullo Rianxo, con motivo das actividades conmemorativas do 28 de xuño Día Internacional da Diversidade Sexual. O obxectivo é fomentar a participación da rapazada e dos centros educativos do municipio locais na promoción da igualdade e a non discriminación das persoas con independencia da súa orientación sexual e identidade de xénero.
Poderá participar a rapazada entre os 3 e os 17 anos de idade, de maneira individual ou colectiva. Amais, cada artista ou artistas poderán presentar unha soa obra orixinal e inédita.
Nas bases establécese que o cartel que opte ao certame deberá reflectir a reivindicación do 28 de xuño, Día da Diversidade Sexual. Nel teñen que aparecer a bandeira do arco da vella ou as cores da bandeira do arco da vella. Figurará de forma visíbel a seguinte lenda: “ORGHULLO RIANXO 2022”. O idioma empregado será o galego. Amais, deberase entregar a obra en formato A4 en JPG, mediante un correo electrónico a igualdade@concelloderianxo.gal. Por outra banda, os traballos deben ser orixinais e inéditos, non presentados noutros concursos.
O cartel gañador terá un premio dun lote de libros e será o cartel que se reproducirá oficialmente
dende o Concello para a difusión do Día do Orgullo.
As bases e as follas de inscrición e autorización están dispoñíbeis na web do Concello.
