O PSOE de Ribeira, a través do seu concelleiro-portavoz José Manuel Vilas, presentou un rogo para ser tratado en pleno relativo aos servizos da praia de Coroso e máis concretamente á cala das Carolinas. Segundo fai saber a agrupación, esta cala, formada polas correntes da enseada logo dos recheos levados a cabo nas Carolinas, é moi frecuentado polos residentes do lugar, “por ser moi recolleito e ter as augas tranquilas, transparentes, e dunha agradable temperatura”. Ademais, salientan, pasan por ela persoas de todas as idades, e tamén persoas maiores. Porén, din, “o lugar non está dotado de servizos especiais para a época do estío”. No rogo, os socialistas piden que se dote ao lugar, no sitio mais propicio, dunha ducha lavapés, para poder desprenderse das areas da praia, e do salitre, tralo seu uso e desfrute do areal. “Tamén podería ser unha ducha adaptada para as persoas de mobilidade reducida”, sinálase na proposta.
