O Porto do Son CF e máis o CF Noia veñen de unir forzas para impulsar o fútbol feminino poñendo o foco no deporte de base e nas idades máis temperás, entre os 6 e os 16 anos. Para este obxectivo, crearán unha escola de fútbol para novas xogadoras locais. “Queremos que as nenas da nosa comarca proben unha nova experiencia deportiva”, sinalan dende as dúas entidades, salientando a importante proxección da que está a ser obxectivo o fútbol feminino ao longo dos últimos anos. A idea é abrir as portas da escola ás nenas dos concellos das dúas beiras do Barbanza, co fin de que se “animen” a practicar o fútbol e poidan inscribir algún equipo integramente composto por rapazas nas ligas que a Federación Galega de Fútbol constituíron recentemente, Liga Promesas, Liga Galega Infantil e Liga Galega Cadete.
Para garantir a máxima participación e explicar os obxectivos do proxecto os venres 10 e 17 de xuño os clubs organizarán unhas xornadas de portas abertas (dúas clínics no Campo de San Lázaro en Noia e no Emilio García do Son) para “todas aquelas nenas e rapazas que queiran probar este deporte”. Será, explican, a primeira de moitas iniciativas que ambas entidades promoverán nas vindeiras datas para “abrir as portas do fútbol da nosa zona a todas as nenas e rapazas que queiran introducirse neste deporte e perfeccionar a súa técnica”.
Na entidade en desenvolvemento terán cabida varios equipos das categorías promise (desde os 6 aos 12 anos), infantil e cadete.
As dúas captacións deportivas serán, como dixemos, os días 10 e 17 de xuño, ambas de 18.00 a 20.00 horas. A inscrición é gratuíta e está dirixida a nenas de entre 6 e 16 anos. A día de hoxe contan cun total de 20 prazas confirmadas.
