A rede de camiños seguros do concello de Ribeira vai sumar unha nova incorporación. Segundo confirmaron fontes do Consistorio, unha senda peonil vai unir os lugares de Xenxides e Salmón, ambos situados na parroquia de Oleiros, a través da marxe dereita da estrada AC-550.
Esta iniciativa está financiada pola Consellería de Infraestruturas e Mobilidade da Xunta, que esta semana vén de contratar os traballos de redacción do proxecto á empresa á empresa Deseños Estruturais e Viarios, S.L..
O que se pretende proxectar é unha senda peonil de 880 metros de longo na marxe dereita da estrada (entre os puntos quilométricos 103+650 e 104+530). “Actualmente”, explicou o Concello, “a zona en cuestión non conta con senda nin beirarrúas, tan só cun pavimento de terra compactada que presenta problemas de transitabilidade en caso de chuvia, e soleiras de formigón nas entradas das vivendas”.
O proxecto contempla desenvolver un itinerario continuo, cunha formalización de acordo aos criterios de deseño de sendas da Axencia Galega de Infraestruturas.
A redacción do proxecto foi adxudicada por 18.089,50 euros e ten un prazo de execución de oito meses.
Reforzo do firme
O Concello tamén lembrou que a Axencia Galega de Infraestruturas licitou por 2.685.503,97 euros o reforzo do firme da estrada AC-550 entre Noia e Ribeira. A este respecto xa se procedeu coa apertura dos sobres A (documentación técnica) habendo un total de 10 ofertas. Este xoves 16 de xuño estaba previsto abrir os sobres B (proposicións técnicas).
