O Concello de Dodro no Festival Internacional ATLÁNTICA de narración oral

O Festival Atlántica vén de anunciar este mércores na Cidade da Cultura o programa completo da súa décima edición, que se vai celebrar entre o 30 de xuño e o 9 de xullo. A presentación tivo lugar nunha rolda de prensa na que participaron Anxo Lorenzo, secretario Xeral de Cultura da Xunta de Galicia; Xurxo Couto, deputado de Cultura da Deputación da Coruña, Mercedes Rosón, concelleira de Acción Cultural do Santiago de Compostela; e Soledad Felloza, directora de Atlántica. Polo Concello de Dodro asistiron o
concelleiro de Cultura e Patrimonio Xoán Xosé Vicente Franco e o de Deportes e Educación Abel Tarrío Abuín.
Destacou Soledad Felloza ao Concello de Dodro pola súa incorporación a este festival e pola súa elección dos escenarios dos actos porque “non esquece os lugares tradicionais de traballo e tan vinculados aos contos como as eiras de Traxeito e de Bexo en Dodro” Os espectáculos que o Festival Atlántica trae a Dodro son o día sábado 2 de xullo na Eira de Traxeito “Dragoeiros e biosbardos” de Sofía Maul de Portugal e Charo Pita de Galicia e na Eira de Bexo o venres 8 do mesmo mes “Contos para caghar patatillas” de Brais das Hortas de Galicia.