A deputada Rosana Pérez e o alcalde rianxeiro Adolfo Muíños compareceron na contorna dos Lombos do Ulla este xoves 23 de xuño, xunto cos portavoces do BNG en Ribeira e Boiro, para explicar as novas iniciativas que se debaterán no Parlamento nas que lle reclaman “medidas urxentes á Administración galega diante do descenso continuado da produción”.
A deputada nacionalista explicou que “malia a riqueza extraordinaria da ría de Arousa, o Goberno galego non está dentro dos seus obxectivos ter unha calidade das augas que garantan esa biodiversidade e esa capacidade produtiva ante unha situación que é clamorosa”.
Os nacionalistas botan man dos datos da Plataforma Tecnolóxica da Pesca, da Consellería de Mar, nos que, segundo din, demóstrase que o descenso produtivo nos últimos vinte anos é “estrepitoso nalgúns casos”, como no do berberecho ou no do reló onde na actualidade só se está a producir o 22,8% e o 13,8% respectivamente da media da produción dende o ano 2002.
Así, se a produción media de berberecho no período 2002-2021 foi de 724 Tn./ano, no 2021 só se produciron 165 Tn. O BNG do Barbanza sostén que no caso do reló “a súa presenza na ría non pasa de ser testemuñal e fronte á produción media de 493 Tn./ano entre o 2002-2008 e o 2015-21, no 2021 foi de 68 Tn”. O descenso é tamén moi preocupante noutras especies como a ameixa babosa, a fina e a rubio, ou como o camarón e o percebe, engaden.
Pérez Fernández mostrou o apoio do BNG ás confrarías, agrupacións de mariscadoras e as asociacións de produtores de mexillón, así como ás distintas asociacións ecoloxistas, “o sector do mar arousán é consciente de que non hai un único problema pero asiste desolado á inacción do Goberno galego”.
Pola súa banda, o rexedor rianxeiro argumentou que “é unha necesidade inmediata implementar medidas e poñer recursos humanos, económicos e tecnolóxicos para investigar as condicións ambientais, os vertidos, a calidade da depuración das EDAR e a calidade das augas dos ríos que desaugan na ría de Arousa”. Segundo Muíños a propia ría está abocada a “un empeoramento e a un deterioro aínda maior que será cada vez máis difícil de corrixir e que implicará unha perda aínda máis importante de produción e, polo tanto, de postos de traballo”.
Desde o BNG indican que as solucións teñen que vir da man das análises e dos estudos que encamiñen as medidas a tomar, “a comezar polas máis urxentes para deter o declive e a seguir polas que leven de xeito paulatino á recuperación ambiental e ao incremento dos niveis de produción”, sinalaron, engadindo que a Xunta dispón de centros propios de investigación como o CETMAR, o CIMA e o INTECMAR, ao que se engade o Observatorio Costeiro de Galiza, e malia todo isto, apuntan, “fallan as decisións e as actuacións políticas que puideran evitar a desfeita”.
“Agora, se o Goberno galego quere poñerlle remedio, xa non é momento de parches. Agora cómpre analizar e intervir decididamente, conxuntamente co sector, de deseñar un plan de actuacións a curto, medio e longo prazo, e de destinar os recursos humanos e económicos necesarios que permitan recuperar medio ambientalmente e produtivamente a ría de Arousa”, concluíu Pérez Fernández.
—
