O BNG de Ribeira solicita rozas e melloras de accesibilidade para Artes

O BNG de Ribeira reclamou este martes 14 de xuño a roza da maleza e mellorar a accesibilidade nas beirarrúas da parroquia de Artes. Segundo fai saber a agrupación, as beirarrúas da parroquia “non se caracterizan por seren amplas, máis ben todo o contrario, son bastante estreitas pero nalgúns puntos aínda se fan máis escasas debido á maleza que crece ou mesmo a sinais que dificultan o tránsito”. O BNG tamén critica que o Concello mandase colocar recentemente un sinal de paso de peóns no cruzamento que vai á igrexa, “de tal maneira que estreita a beirarrúa nese punto poñendo dificultades ao tránsito peonil”. Isto, din, obriga ás persoas que levan carro de crianzas ou de compra a baixar á estrada “para poder continuar camiñando”.

O portavoz nacionalista, Luís Pérez Barral, asegura que “ademais deste sinal, é habitual ver como a maleza invade as corredoiras e parte do itinerario peonil nalgúns puntos das beirarrúas que atravesan Artes”. E engade: “Ano tras ano a maleza invade as corredoiras porque non existe planificación, o goberno actúa a golpe de improvisación”.

Os nacionalistas opinan “que o Partido Popular está sometendo ás parroquias de Ribeira a un abandono cada vez maior e a unha discriminación por falta de investimentos”. E conclúen: “Ante esa parálise, falta de planificación e de investimentos, no BNG imos seguir traballando a carón da veciñanza, como xa estamos a facer, presentando propostas e iniciativas que melloren a calidade de vida da veciñanza” concluíu Pérez Barral.