O Auditorio de Ribeira encheu o seu aforo este domingo pola tarde-noite con motivo da clausura do curso 2021-2022 da Escola Municipal de Ballet. Participaron no festival medio centenar de bailarinas, cuxa actuación foi recoñecida cun rotundo aplauso do público. A cita encadrouse na programación do Xuño da Cultura e as Artes, que retomou a súa actividade despois de dous anos nos que non que foi posible celebrar este tradicional espectáculo.
As rapazas interpretaron a función Soño dunha noite de verán, con música de Felix Mendelssohn a partir da célebre obra dramática de William Shakespeare e cunha coreografía adaptada por parte da directora da Escola, Cristina Riveiro.
Ao longo dunha hora desenvolveuse un espectáculo na que dúas amigas se disputaban a simpatía dunha fada nun ambiente máxico poboado por elfos, trasnos, fadas e vagalumes.
A continuación tivo lugar a entrega de diplomas a todas as integrantes da Escola Municipal. A concelleira de Cultura, María Sampedro, felicitou ás talentosas bailarinas e a súa profesora por deleitarnos coa beleza desta actividade e animounas a seguir esforzándose para que no ano que vén nos volvan a brindar o seu bo facer.
