O Concello de Boiro colabora coa novena edición do Campus Obradoiro Jealsa, que se vai desenvolver entre o 27 de xuño e o 2 de xullo.
A actividade está destinada a rapaces e rapazas de entre 6 e 18 anos e vaise celebrar nas instalacións polideportivas do CEIP Santa Baia e CEIP Praia Xardín e nos pavillóns da Cachada e Barraña e está aberto a rapaces e rapazas de Boiro e toda a contorna. “Este ano podemos volver á normalidade e recuperamos o aforo global ao non haber restricións”, afirmou Daniel Agra.
O xogador, Fernando Zurbriggen, animou a todos os rapaces e rapazas a participar xa que “estas actividades suponen una muy buena oportunidad para prosperar y aprender, además de comprometerse con el deporte”. Dende a dirección do Club de Baloncesto Santa Baia indicaron tamén a importancia de
participar nestas actividades para potenciar o baloncesto no municipio.
A directora de relacións institucionais de Jealsa, Margarita Hermo, afirmou que “é un privilexio contar cun campus organizado por un club de ACB para as categorías base. Para nós é unha prioridade impulsar o deporte polos valores que transmite de vida sa e compañeirismo”. A concelleira de Deportes, Dores Torrado, afirmou tamén que “esta actividade, ademais de axudar a promocionar o deporte e ofrecer unha alternativa lúdica, favorece a conciliación das familias”. Para o Concello de Boiro é unha prioridade apoiar aos clubs e entidades que ofrecen actividades que poñen o foco na promoción do deporte base en calquera das súas modalidades.
Toda a información para realizar as inscricións do campus está a disposición das persoas interesadas na web do Obradoiro. A inscrición inclúe a equipación de xogo, a mochila, un balón e unha entrada para o primeiro partido da tempada do Monbus Obradoiro.
Na presentación da actividade participaron a concelleira de Deportes, Dores Torrado; o director de marketing do Monbus Obradoiro, Daniel Agra; o xogador ACB do Monbus Obradoiro, Fernando Zurbriggen; a directora de relacións institucionais de Jealsa, Margarita Hermo; e o membro do Club de Baloncesto Santa Baia, Guillermo Outeiral.
