A Asociación Rianxeira de Empresarios (ARE) e o Concello de Rianxo fixeron un primeiro balance da actividade xerada pola campaña conxunta de Bonos Rianxo, impulsados polas dúas entidades para incentivar as compras no concello neste texto postpandémico e de crise económica. Segundo fixeron saber, o pasado martes 24 deu comezo a campaña do programa Bonos Rianxo impulsada dende o Consistorio a petición do comercio local, unha campaña que consistiu na activación da web destinada á descarga dos lotes de bonos. As descargas comezaron ás 12:00 horas e antes das 18:00 xa se descargaran os 400 lotes de bonos virtuais dispoñíbeis.
Por outra banda, tal e como se recolle nas bases da campaña, fíxose unha reserva de bonos para poñelos a disposición, en formato físico, de persoas maiores e/ou con dificultade para acceder aos bonos virtuais. En concreto serán 100 lotes de bonos que se poderán solicitar o vindeiro mércores día 1 na sede da ARE a partir das 9:00 horas. Ao igual que no caso dos bonos virtuais, os solicitantes dos bonos físicos deberán identificarse co seu DNI e asinar unha declaración responsábel sobre o cumprimento dos requisitos establecidos.
Cada lote de bonos ten un valor de 30 € e están divididos en 2 bonos de 10 € e 2 bonos de 5 €. Cada bono de 10 € poderá descontarse en compras iguais ou superiores a 20 € e cada bono de 5 € en compras iguais ou superiores a 15 €. Isto vai supoñer a mobilización de, como mínimo, uns 45.000 € en compras e gastos realizados nos 37 negocios adheridos á campaña. Os bonos poden trocarse até o vindeiro 30 de xuño.
