Ata o 18 de maio estará aberto o prazo para que os concellos coruñeses soliciten as subvencións que a Deputación reserva cada ano para financiar eventos de pintura mural de arte pública. Neste exercicio, o importe da achega da institución provincial ascende a 150.000 euros e o máximo de cada axuda será de 35.000 €. Poderanse beneficiar os municipios que desenvolvan programas, festivais ou certames de arte urbana, cun mínimo de dúas edicións consecutivas de antigüidade, a última delas con posterioridade a 2017.
Os criterios de valoración das solicitudes serán os seguintes, de acordo coa táboa de valoración que figura nas bases:
1. Antigüidade do festival.
2. Número de días de duración do festival.
3. Número de artistas ou colectivos participantes.
4. Número de artistas ou colectivos galegos/as.
5. Número de artistas ou colectivos internacionais.
6. Número de artistas ou colectivos estatais.
7. Actividades paralelas (palestras, concertos, talleres, visitas guiadas…).
8. Medios de difusión do proxecto.
9. Material audiovisual.
10. Aplicación de TIC ao proxecto.
11. Paridade no xénero dos artistas convidados/as.
En 2021 a Deputación concedeulle subvencións, por un total de 75.291,15 €, ao Cromático Mural Festo do Concello de Cambre (22.241,55 €), ao Festival Rexenera Fest do Concello de Carballo (33.205,60 €) e ao Concello de Ordes (19.844,00 €).
As bases da convocatoria están publicadas no enlace: https://bit.ly/3kbrr9x
