A vila de Porto do Son recibiu este mércores 13 de abril a visita do presidente da Xunta, Alberto Núñez Feijóo, quen acudiu para comprobar in situ o resultado final das obras de remodelación e humanización do bordo portuario da localidade, uns traballos que se dirixiron a embelecer a contorna, a devolver os vencellos do núcleo urbano co mar e a priorizar a presenza do peón. O titular do Goberno galego dixo que o proxecto, xa rematado, é un modelo en materia de integración dos portos nas vilas costeiras e a súa apertura ao mar.
“Trátase de compatibilizar a actividade portuaria coa humanización da contorna”, salientou, engadindo que a Administración autonómica investiu nesta obra catro millóns de euros e actuou nunha superficie de 26.000 metros cadrados. Os traballos realizados, dixo, “permitiron reorganizar a vía, crear un edificio de servizos náuticos e portuarios na proximidade do dique, humanizar a contorna coa plantación de árbores, harmonizar a zona de xeito que todas as rúas que cruzan a vila ata o porto teñen pavimento de pedra e construír unha rotonda elevada á que se trasladou o emblemático hórreo da vila”.
Nesta mesma liña, Feijóo avanzou que a Xunta ten previsto novos proxectos na zona vencellados ao ámbito marítimo, como a mellora do abrigo e ampliación do número de atraques no porto de Portosín -cunha achega de 1,9 millóns de euros- ou o acondicionamento das lonxas de Porto do Son e de Portosín. A estes proxectos, sinalou, sumaranse outros en eidos como o educativo, coa construción dun novo colexio; o sanitario, cun novo centro de saúde; ou o saneamento, cunha nova depuradora na parroquia de Queiruga.
