A Semana Santa do Son recupera o seu tradicional programa de actividades

O pasado venres 1 de abril presentouse en Porto do Son o programa local de actividades relixiosas da Semana Santa 2022, que recupera o seu pulso na vila logo de dous anos cunha axenda reducida. A axenda foi dada a coñecer pola Confraría da Paixón do Noso Señor e máis polo Concello, que colabora no programa, cuxos detalles pódense consultar na páxina web da Confraría.

As actividades comezan o venres 8 de abril (Virxe das Dores). Haberá misa na honra da Virxe (e na memoria dos cofrades falecidos) ás 20h na igrexa parroquial. Os actos proseguirán o 10 de abril, Domingo de Ramos, coa misa das 12.00 horas na igrexa parroquial e coa bendición das palmas e dos ramos. O 12 de abril, Martes Santo, celebrarase o Vía Crucis logo da misa das 20.00 horas, na igrexa parroquial.

O día 14, Xoves Santo, haberá misa ás 18.00 horas e a continuación unha procesión coa Agrupación Musical Virxe da Amargura de Ferrol. O Venres Santo as actividades comezan na praza de España ás 10.30, coa escenificación prevista para ás 11.00 (con prédica do sacerdote franciscano Roberto Freire Hernando) e coa Banda de Tambores da Cofradía da Paixón do Noso Señor. Conmemorarase a cerimonia do Desprendemento da Cruz e o traslado do corpo de Xesús cara ao sepulcro. A liturxia e o desencravo será na igrexa parroquial ás 18.00 horas. Haberá procesión ao rematar a liturxia, coa Banda de Música Municipal de Brión. Ás 23.00 horas levarase a cabo a tradicional procesión nocturna do Venres Santo, dende a Capela da Atalaia e coa Banda de Tambores da Confraría da Paixón do Noso Señor e a Banda Municipal de Brión.

O Domingo de Resurrección a procesión sairá ás 11.00 da Capela da Atalaia (coa Banda de Música de Caldas de Reis) e haberá misa na Igrexa Parroquial. No medio do percorrido, na praza de España, terá lugar o Encontro de Resurrección.

Organiza a Confraría da Paixón do Noso Señor e colabora o Concello de Porto do Son.