A partir da semana que vén queda cortada a circulación no Paseo da Ribeira

A Policía Local de Rianxo vén de informar á cidadanía dun corte de tráfico no Paseo da Ribeira a partir da semana que vén. Segundo explica, o corte débese aos traballos que está a realizar a empresa Proyecon, concesionaria das obras de construción da nova EDAR de Rianxo.

Segundo informaron en datas pasadas nunha reunión mantida no Concello, con asistencia de representantes da Asociación Rianxeira de Empresarios, Asociación Somos Rianxo e Policía Local e presidida polo alcalde do Concello, Adolfo Muíños, as actuacións previstas nese punto comezarán o día 4 de abril de 2022 e terán una duración aproximada de unha semana. Os traballos inclúen a repavimentación da zona afectada polas obras. Atinxirán á circulación rodada en distintas fases de implantación no tramo comprendido entre o peirao de Setefogas á zona dos xardíns.

Durante as actuacións necesarias en dito punto, a circulación de vehículos lixeiros que pretendan acceder ó casco antigo e á zona portuaria así como o tráfico de vehículos pesados con orixe ou destino á zona portuaria deberá efectuarse pola estrada de Tanxil, utilizando o itinerario habitual pola rúa Rosalía de Castro/estrada de Rianxiño, rúa Arcos Moldes e cruce de Xogo dos Bolos.

Consecuentemente coa remodelación da circulación efectuada na zona antiga habilitáronse zonas de carga e descarga e parking express na praza de Rafael Dieste.