A Consellería do Mar fixo un balance da actividade xerada polo sector pesqueiro galego durante a COVID, un ámbito económico e produtivo que, segundo indica o departamento que dirixe Rosa Quintana, “resistiu mellor ca outras actividades económicas o impacto da alerta sanitaria polo coronavirus”. Proba desta evolución, engade a Consellería, é o selo de calidade dos produtos do mar pescadeRías, de onde se non? Así, os peixes e mariscos amparados por este distintivo aumentaron en 2021 case un 30% en relación co ano anterior, ata roldar as 14.400 toneladas, cifras semellantes ás rexistradas antes da pandemia. O papel máis destacado foi o da lonxa de Ribeira.
A Consellería engade que a mellora nos datos de produto comercializado con esta etiqueta (creada por Mar para garantir a frescura, orixe e sustentabilidade do peixe e marisco capturados pola frota artesanal) “viuse acompañada ademais dun crecemento tanto no número de entidades certificadas como adheridas ao selo, que veñen incrementándose de xeito constante desde a súa creación”.
Na actualidade hai 136 axentes certificados -lonxas e centros de primeira venda, centros de depuración e/ou expedición, distribuidores e empresas de transformación- así como 350 axentes adheridos, entre comerciantes polo miúdo, restaurantes e tendas online.
Mar salienta tamén no seu balance que entre as lonxas certificadas co selo pescadeRías destaca a de Ribeira, que “é a que máis produtos do mar comercializou con este distintivo en 2021, con preto de 2.400 toneladas”. De feito, o centro de primeira venda ribeirense puxo no mercado preto do 17% dos peixes e mariscos amparados por esta etiqueta, por diante de Noia, que roldou as 1.700 toneladas e preto do 12% do total. A continuación aparecen Malpica (1.480 toneladas), Corcubión (1.075 toneladas) e Portonovo, con máis de 970 toneladas.
Por especies comercializadas, hai dúas -a vieira e ostra- nas que toda a produción se vendeu baixo o selo pescadeRías, mentres que outras moitas acadan índices de arredor do 90% do total. É o caso do berberecho (máis de 1.500 toneladas), da ameixa xaponesa (máis de 1.400 toneladas) ou do polbo (944 toneladas), as especies con maior volume de ventas rexistradas.
