Baixo os lemas Somos iguais e Porto do Son coa igualdade, o Concello de Porto do Son organizou unha actividade dupla para a celebración deste 8M, Día Internacional da Muller. En primeiro lugar realizarase un obradoiro de sensibilización en igualdade na Casa da Cultura da vila sonense, estando previsto que participe alumnado de primeiro da ESO do IES Porto do Son. Esta actividade culminará cunha marcha en contra da discriminación e a violencia de xénero polas rúas da vila.
A outra actividade prevista desenvolverase baixo o epígrafe Na casa tod@s iguais e consiste nunha Xincana de co-responsabilidade co alumnado de Educación Infantil e de Primaria dos centros educativos de Seráns, Lapido, Xuño, Caamaño, Queiruga, Baroña, Nebra e Portosín. A xincana ten o obxectivo de traballar colectivamente pola igualdade e o traballo en equipo, amais de derrubar estereotipos e prexuízos negativos para as mulleres relacionados cos traballos empresariais e domésticos.
