O parque periurbano de San Roque deu cabida hoxe ao mediodía ao acto de conmemoración do 25 aniversario da Asociación Galega de Lupus (AGAL) a través da plantación de 25 árbores no marco do proxecto Landra que se está a desenvolver nesta zona.
O acto contou coa participación entre outros do alcalde Manuel Ruiz; o director xeral de Maiores e Persoas con Discapacidade, Fernando González; da presidenta de AGAL, Nuria Carballeda; de distintos edís municipais e tamén de representantes das distintas delegacións territoriais da asociacion, entre elas Loli Caderno por Barbanza.
Tamén se achegaron numerosos veciños a respaldar o acto, incluíndo numerosos membros do motoclub Os Reventapistóns.
Os comparecentes quixeron poñer en valor o papel que desempeña AGAL para visibilizar esta doenza e prestar apoio a quen as padece e as súas familias.
