Este venres 11 de marzo a diversidade, a inclusión e respecto mutuo van ser protagonistas en Boiro, grazas ás contribucións das integrantes da Asociación Ambar, colectivo de persoas con diversidades funcionais ou motrices con sedes en Ribeira e A Pobra. Estamos a falar da representación de As paisaxes de Camille, unha destacada contribución teatral, que toma partido, directamente e sen fisuras, pola loita contra a violencia de xénero no rural.
As paisaxes de Camille chega a Boiro logo dunha exitosa xira pola xeografía galega e polo Barbanza (Ribeira e A Pobra) que foi quen de convocar arredor de 200 espectadores e espectadoras.
O proxecto As paisaxes de Camille é unha iniciativa para loitar, dende a creatividade, o talento e a reivindicación, contra a violencia de xénero no ámbito rural en calquera das súas manifestacións. En concreto As paisaxes de Camille busca apoderar ás mulleres con diversidade funcional a través da expresión artística, explorando a contención, a rabia, a delicadeza e a sororidade, atravesando a imaxinaría escultórica e a vida da escultora francesa Camille Claudel.
A peza está producida por Ambar, conta coa dirección artística da creadora escénica Helena Salgueiro da plataforma ABAR e cun elenco composto integramente por mulleres con diversidade funcional: Noelia Argibay, Ángeles Devesa, Marina Mondelo, Conchita Mouriño, Carmen Pérez, Olaia Pérez, Montse Queiruga e Mercedes Río.
Esta acción enmarcase no Pacto do Estado contra a violencia de xénero e está financiada pola Axencia Galega de Desenvolvemento Rural.
Para máis información sobre o proxecto cómpre visitar a web de Ambar, no apartado específico sobre o mesmo. As integrantes da asociación tamén subiron ao Youtube un vídeo de presentación.
